“Prima Consulting” şirkəti Təhsil Tələbə Krediti Fondunun fəaliyyəti ilə bağlı ictimai rəy sorğusu və sosioloji tədqiqat layihəsini uğurla başa vurdu.
Tədqiqat Bakı, Sumqayıt, Gəncə, Şəki, Lənkəran, Mingəçevir, Quba və Şamaxı da daxil olmaqla bütün ölkə ərazisini əhatə edib. Sorğu anketi 11, 4 kateqoriya üzrə keçirilən 16 fokus-qrup dəyərləndirmə isə ümumilkdə 43 sualdan ibarət olub. Sorğuda TTK-dan yararlanmış 6 min tələbənin, həmçinin paytaxt və bölgələrdə keçirilən 16 fokus-qrup dəyərləndirmə çərcivəsində iştirak edən 343 nəfərin fikr və rəyi qeydə alınıb.
Analitik hesabatda TTKF-nin formalaşması, təkamülü və inkişaf dinamikası ilə bağlı proseslərin qısa dəyərləndirilməsi əksini tapıb. Bundan başqa təhsil tələbə kreditinin verilməsində mövcud vəziyyət, beynəlxalq təcrübə və perspektivlərin öyrənilməsinin nəticələri qeyd olunub.
Təhsil Tələbə Krediti Fondunun təşəbbüsü ilə “Prima Consulting” şirkəti tərəfindən həyata keçirilən ictimai-sosioloji sorğu layihəsi Fondun fəaliyyəti, məmnunluq və əlçatanlığı ilə bağlı aparılan tədqiqatlar sırasında ilklərdən hesab edilə bilər. Layihənin məqsədi TTK-nın verilməsi sahəsində mövcud vəziyyətin dərindən öyrənilməsi ilə bu sahədə görülən işlərin daha da təkmilləşdirilməsinin yollarını müəyyənləşdirməkdir.
Qeyd edək ki, analitik hesabat TTK-dan yararlanmış tələbələrin, onların valideynlərinin, təhsil müəssisələrinin əməkdaşları, eləcə də ölkəmizdə müxtəlif sahələrdə fəaliyyət göstərən bir sıra ekspertlərin fikirləri, təklifləri və tövsiyələri əsasında hazırlanıb.
